Sa Takasan green ordinance
Ni Cha Monforte
jan 11
Hugtanong gipahibalo ug usab ang mga nagadagan nga mga kandidato nga subay sa naaprubar nga ordinansa sa probinsya gidili gayod ang pagbutang sa bisan unsang advertisement material o subay sa politikanhong panahon karon, sa bisan unsang election propaganda material sa mga kahoy kilid sa kadalanan.
Kini ang gibutyag ni Boardmember Moran Takasan human siya makadawat ug taho nga may mga pagpanglapas na nga nahitabo sa Distrito 1 sa probinsya sa Provincial Ordinance Number 05, series of 2009 nga iyang gisulat ug naaprubar sa miaging tuig.
Ang maong ordinansa probinsyal magamulta sa nakalapas ug kantidad ng P5,000 o dili kaha pagkapriso sa unom ka bulan sa third offense.
Boluntaryo lang nga molangkat sa mga advertisement material gikan sa mga kahoy sa gasto sa nakalapas sa first offense, samtang sa second offense, pwersado na nga langkaton na sa mga personahe sa probinsyal nga kagamhanan ug bayran sa nakalapas ang entirong nagasto sa probinsya sa pagpanglakat sa mga advertisement materials nga gibutang sa mga punoan.
Sumala pa sa mga taho, si controversial ex-police officer Cesar Mancao nga midagan pagka kongressman sa Distrito 1 namilit sa iyang greetings posters niadtong panahon sa kapaskuhan sa mga poste ug bongbong apil na ang mga punoan sa kahoy. Ang gipilit nga greetings poster ni Mancao may hulagway ug pangalan niya.
Matud pa ni Takasan, mipahibalo na si Boardmember Maricar Zamora-Apsay sa mga pagpanglapas sa ordinansa ngadto kang Governor Arturo “Chiongkee” Uy.
“Mopagawas usab si governor ug usa ka executive order nga mopahibalo sa tanang mga municipal mayors ug tanang barangay kapitan sa tibuok probinsya kabahin sa ilang mga papel sa padayong full implementation sa ordinansa,” pamulong pa sa author sa ordinansa.
Matud niya iyang gihimo ang ordinansa aron protektahan ang mga kahoy ug kinaiyahan, ug sa pagmentenar sa kalimpyo samtang gusto pod niyang mahalayo sa disgrasya ang mga pasahero ug motorista tungod kay ang mga outdoor advertisement nga gipatak-ag butang sa mga kahoy kilid sa kadalanan makapalingla sa mata ug atensyon sa mga drayber sa sakyanan sanglit gitumbok kini nga usa ka hinungdan sa disgrasya sa kadalanan.
Dili lamang ginabawalan sa ordinansa ang mga politiko, kay lakip usab ang mga tawo ug mga negosyo nga nagabutang ug mga commercial outdoor advertisements.
“Unsay sala sa kahoy nga imo mang gilansangan?” pamulong pa ni Takasan nga para ngadto sa nakalapas sa iyang green ordinance. (Cha Monforte/Rural Urban News)