BALITA: Yayong mihagit kang CO, Olano lumba sa baktas sa udtong tutok

Ni Cha Monforte, Rural Urban News

FEB 26

Gihagit kagahapon ni magpapili pagka mayor sa Tagum Gelacio “Yayong” Gementiza ang iyang kaatbang nga sila City Mayor Rey Chiong “CO” Uy ug Kongresman Arrel Olano nga makiglumba kaniya ug binaktasay sa pagpangampanya nila sa mga tawo para sa umaabot nga piniliay.

“Hagiton nako sila sa binaktasay sa udtong tutok,” matud pa sa 75-anyos nga kanhi gobernador kinsa una nang gimakmak ni Mayor Uy nga usa na ka “dying moon” kun tigulang na gikan nahimo kining usa ka “shining star” sa una.

“(Sa miagi ganing adlaw) didto mi sa Pagsabangan ug ang akong mga kauban gikutasan gayod sa pag-apas sa ako ug baktas,”segun pa ni Yayong kinsa wa milimod nga nagahimo ug handshaking o pangumusta ug pag-abi-abi na ngadto sa mga taga barangay “sama sa ubang mga kandidato” bisag wala pa nagsugod ang pormal nga campaign period sa mga lokal nga kandidato karong Marso 26.

Sa iyang pagka “dying moon”, si Yayong mitubag: “natural kay tigulang na, but I’m still strong (pero baskog pa ko).”

Si Yayong usab miingon nga ang iyang kalaban pagka mayor mao “si CO ug dili si Olano” kay matud niya okey lang sa iya kung kinsay modaug kanila ni Olano.

“Pero gihunong na nako ang pag-endorse kang Olano karon,” matud niya.

Mimakmak usab si Yayong ang mga palisiya ni Uy sa pagpataas sa buluhisan nga giingon niyang mireklamo ang daghang mga negosyante ug katawhan, ug nga mapahunong “ang mga patay sa Tagum”.

Una nang gitubag ni Mayor Uy ang maong isyu nga igo lang siyang relihiyosong miimplementar sa pagpamuhis ug kadtong nagayawyaw “gahi gayod mobayad ug buwis”.

Giingon usab nga pipila lang ug dili daghan ang nagareklamo sa buluhisan samtang ang mga nakuhang buwis tataw man nga miadto ngadto sa daghang makit-an nga mga dagkong proyekto sa administrasyon ni Uy.

Si Uy usab una nang miingon nga ang nangamatay sa gikatahapang extrajudicial killings sulod sa syudad “mga maldito” ug nga ang syudad karon may kalinaw ug may todong seguridad ang mga Tagumenyo kinsa wa silay kabalak-an nga magsuroy-suroy sa kagabhion.

Sa mao gihapong pakighinabi, si Yayong miingon nga sa iyang paglakaw-lakaw karong panahona siya nagapangutana sa mga tawo nga kung kintahay si Vice Governor Victorio “Baby” Suaybaguio Jr midagan pagka mayor batok kang Olano, ang iyang kanunayng mabatian ng tubag nga “si Baby ang modaug”.

“Kay gipildi na man nako si Baby pagka mayor sa una, pasabot nga mapildi nako si Olano, mao nga si CO gayod ang akong tinuod nga kalaban pagka mayor,”pagkumparar pa ni Yayong.

Gikataw-an lang usab ni Yayong ang alegasyon batok kaniya nga usa sa mga tax evaders sa Tagum City . Apan sa sunod yugto miadmitar siya nga may nalimtan gayod siyang wa nabayran nga buwis “pero sa una pa to dihang akong gilote-lote ang akong yuta pero nabayran ra pod.”

“Naa sa record nako karon nga quarterly ko nagabayad ug buwis sa city hall,” matud pa niya.

Kahinumduman nga kaduha na nga gipildi ni Yayong si Uy sa panag-away nila sa politika niadtong 1992 sa pagka bise gobernador sa dako pa nga probinsya sa Davao del Norte ug niadtong 2001 pagka mayor sa Tagum.

“Wa nato na gilimod, apan tungod kay kaniadto si Yayong mao pa man ang shining star apan karon dying moon na siya,” matod pa sa mayor sa unang pakighinabi. (Cha Monforte/Rural Urban News)

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: