BALITA: “DANECO way P4 M pondo para sa performance bonus sa mga empleyado”- Briz

Ni Cha Monforte, Rural Urban News

feb 9 

Way pondo kay wa pay supplemental budget para sa P4 milyones nga performance bonus para sa mga opisyales ug empleyado sa Davao del Norte Electric Cooperative.

Mao kini ang giluwatan nga pamahayag ni  Daneco board president Dean Briz samtang gikataho nga grabe nang pag-alingasa  sa 146 ka empleyado nga giingong atat na atat na nga makadawat sa gisaad nga usa ka bulang sweldohan nga performance bonus matag usa kanila.

Apil usab ang mga opisyales ug miyembro sa hunta direktiba nga makadawat ug usa ka bulang performance bonus nga mokantidad ug P9,000 matag usa sa 11 ka director.

Mokantidad sa P35,016 ang performance bonus ni OIC general manager Allan Laniba samtang kasagaran sa mga department managers may performance bonus nga sobra P20,000.

Si Briz nagkanayon pinaagi sa text message kagahapong adlawa nga dili lang gayod mabalaka ang mga empleyado “kay mahatag gayod nato na, ato lang gyod ginaplastar kay wala gyoy klaro ang pagplastar sa mga hingtungdan sa management, bantog ra nga nagkalisud-lisud ta sa mga nangaging katuigan kay dili man gyod maayo ang pagdala intawon sa unang mga kapanahonan.”

Una nang mipagawas ug kalain si Briz ngadto kang Laniba tungod sa iyang giingon nga siya ug iyang kaubanan sa hunta direktiba na hinoon ang morag nahimong kontrabida ngadto sa mga empleyado sa Daneco human sila gisaway nga wala nakasabot sa malisud nga kahimtang sa mga empleyado.

Matud ni Briz miabot sa iyang lamesa ang duha ka voucher ug duha ka cheke nga may suma kantidad nga P4,086,886.82 apan matud niya wala kini niya pirmahi kay subay sa tambag ni Daneco treasurer Ananias Darjan Jr gikinahanglan pa nga isubmitar ni Laniba ang usa ka supplemental budget para paaprubahan sa hunta direktiba.

“Asa man pod ta mangita aning sobra P4 milyon samtang ang surplus lang sa Daneco sa 2009 mokantidad lang ug sobra P1.6 milyon?” pangutana pa ni Briz.

Tua kagahapon sa Manila si Laniba ug siya gipangayoan ug pamahayag apan hangtod sa pagsulat ninii wa pa siyay gipadala nga text message.

Sa pakisusi sa Pariodico Tagum kagahapon, usa ka empleyado sa finance department sa Daneco Tagum office nga dili gusto magpaila sa prensa ang mitubag sa rason ni Briz nga dili tinoud nga way pondo para sa performance bonus sa mga empleyado kay kini makuha man gikan sa general funds para sa operations ug ang gikinahanglang kwarta i-transfer lang ngadto sa payroll funds.

Niadto pang Nobyembre 14 sa miaging tuig naaprubaran ang resolution numero 267 sa Daneco board of directors (BOD) nga maghatag ug duha ka bulan nga sweldohan para sa performance bonus sa mga empleyado, ug duha ka bulang per diem para sa mga miyembro sa BOD. 

Apan niadtong Disyembre 8, 2009 mipakanaog ug usa ka direktiba ang National Electrification Administration nga ang tugutan lamang mao ang usa ka bulan nga sweldohan ug per diem. (Cha Monforte/Rural Urban News)

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: