OPINYON: Karon ra nagpakita na pod

TSA PWERA
Ni Cha Monforte

dec 19
Mora mag mihilom kadyot ang kalandrakas ug kasaba sa politika human sa deadline sa filing sa CoC sa mga kandidato niadtong Disyembre 1. Nangalimyon na pod ug ensakto ang kahumot sa Pasko labi na nga anaa na kita sa panahon sa Misa de Gallo. Apan kabalo biya kita nga may laing dugo ning mga politiko nato kay bisag unsang okasyon gamiton man sa pamolitika, kay gani sa Tagum City may usa ka kongresman nga grabeng panghatag ug pinaskuhan- kalendaryo ug 2 ka kilo nga bugas nga gisulod sa plastic nga naay giimprintang nawong ug pangalan niya. Natural lang na- nanghatag gud ug libre, nga sa tinuuray gikan sa buwis sa katawhan ra pod.
*****
Salamat gihapon sir kongresman kay karon ka ra man ka nagpakita sa katawhan, human niadtong pista sa Tagum, sanglit kaduha ra gyud ka nagpakita sa katawhan sulod niining tuiga, alegasyon pa sa iyang mga kaaway sa politika. Pero may dakong apan gihapon tungod kay mokaratil man gihapon ang kongresman ug biya sa daghang namaskuhay nga katawhan sa iyang residensya ug dayong sutoy sa iyang sakyanang may plakang 8. Salig man gud seguro nga may mga boy siyang nanghatag sa iyang mga kalendaryo ug bugas.Bisag wala ka, salamat gihapon Kong sa imong pinaskuhan!
*****
Wa ta mamuyboy dinhi. Ang ato lang nga pwede man nga di magpakita ug dugay ang kongresman sa publiko kung kanunay kining nagataho sa iyang ginabuhat sa Kongreso pinaagi sa media. Daghan mang mga radio station ug newspaper sa Tagum City, apan di man pod pa-interview ang kongresman. Wa gyud gani ko kadungog niya nga bisag kausa karong tuiga nagpa-live interview ka sa bisag usa ka radio broadcaster sa Tagum City aron mohatag sa iyang mga kahimoan sa Kongreso ug baruganan sa mga nag-unang isyu. Unsaon man gud pod wa may SODA o State of the District Address ang mga kongresman. Kun sabagay, kandidato na man gud siya pagkamayor karon maong nagpakita-kita na pod sa publiko.
*****
Dili pareho ang mga kongresman sa mga gobernador nga may State of the Province Address (SOPA) o sa mga mayores nga may State of the Municipality Adress (SOMA) matag tuig aron motaho sa publiko sa ilang mga accomplishments bisag morag sum-ol na ni nga mga ritwal diin ang namating audience kasagaran abtan ug katulgon sa pagpamati sa mga pagpasiatab ug pagtagawtaw sa ilang mga kahimoan nga gihimo diay sa sweldado sa katawhan nga mga empleyado sa gobyerno.
******
Alang sa mga kandidato, mas maayo gayud nga samtang layo pa ang piniliay magbinantayon gayud kamo sa inyong mga buhat sa publiko kay basig daut na mo panahon sa opisyal nga campaign period sa Marso. Tataw nga nagbaton ang mga kandidato niani, mao gani nga kanya-kanya na ang pa pogi points karon. Magpakabuotan labi na sugod karong panahon sa kapaskuhan.
******
Apan may usa ka kandidato sa lungsod sa Nabunturan nga morag wa may hunahuna niani kay nagpadayon gihapon siya sa iyang hinambug nga imahen. Abi niya nga ang paghatag lang sa nang-solicit maoy basehanan sa pagboto sa katawhan kaniya. May imahen ni siya sa publiko nga kung di gani nag-inom ug beer, nagtawag ni sa iyang cellphone, ug kanunayng moingon “gihigugma man gud nako ang akong lungsod sa Nabunturan.” Tungod nianing imahen niya nga cellbeer (cellphone ug beer), mao tong napildi gayud siya sa barangay nga piniliay. Apan karon magpapili daw siya pagka________. Pag-txure diha sir uy!
******
TINALIGSIK: Maayo ang tandem ni Dr. Miller Alaba pagkamayor ug Atty. Mario Sapilan pagka bise mayor sa Maco. Comval. Doktor ug abugado, ug puros nahimo nang mga nino bonito ang duruha sa ilang lungsod…. Si Konsehal Dolfo Ang ang miparang kang Bise Mayor Jess Bolo sa pagka mayor sa Compostela, Comval. Puros dagkong negosyante ang duruha. May giisyu lang mga insik nga negosyante si Dolfo ug giingon sa mga kaaway niya sa politika nga may laraw nga kontrolahon ang ekonomiya sa lungsod. Kinahanglan nga tubagon ni Konsehal Ang ang isyu. Tama o mali?…. Morag lain pod nga gibiyaan ni ex-Miss Universe Margie Moran si Boardmember Roger “Dangpanan” Israel nga midagan pagka bise gobernador batok kang Vice Gov. Baby Suaybaguio.  Morag nailo hinoon si Dangpanan samtang si Baby may amahan nga si Governor Dolfo del Rosario, kinsa way kaparang sa iyang reeleksyon. Tan-awon nato kung tinud-on ba gayod sa mga Floirendo ang pagsuporta kang Dangpanan…. Two Lopoz lawyers running for congressman in Comval. Si Atty. Jun Lopoz, ang kinamagulangan sa pamilyang Lopoz sa Montevista, dinha sa Distrito Uno, ug si Atty. Rex Lopoz, ang kinamanghuran dinha sa Distrito Dos. Puros kabag-ohan ang panawagan sa duruha…. Nagkakusog nga hinoon ang kandidatura pagkamayor ni Fr. Em-Em Luego sa Sto. Tomas bisan pag daghan nang mga isyu ang gipanglabay sa duruha ka kaatbang niya. Kabalo man gud sila nga ang pari mapasayloon gayud…. Midagan pagkamayor sa Tagum City si kanhi Gov. Yayong Gementiza batok sa kang City Mayor Rey Uy ug Congressman Arrel Olano, ug matud pa sa Bol-anon nga karaang damang sa politika sa Tagum, “makuhaan gayud ug boto si CO kay close man sa simbahan ug Iglesia si Olano”. Ang boto matunga? aron molusot si Sano? Cg tan-awon tah, txt pa sa akong amigo. (mag e-mail: chamonforte@yahoo.com)

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: