OPINYON: Namangka sa duha ka sapa

TSA PWERA
Ni Cha Monforte

Namangka sa duha ka sapa

Morag kinahanglan na gyud nga si kanhi Bise Gobernador Anthony Rafael del Rosario (AGR) sa Davao del Norte nga mo-resayn na isip empleyado sa Kapitolyo tungod kay lain tan-awon nga siya nagakampanya ug suporta kang Noynoy Aquino sa oposisyon samtang ang iyang papa nga si Governor Rodolfo del Rosario anaa sa administrasyon. Di ta moingon nga gidili na ang pagpagawas sa pagtoo sa politika sulod sa Kapitolyo bisag kontra pa kini sa dispensasyon. May tanang kagawasan si AGR sa pagbatbat sa iyang political belief bisan asa pa man ug bisan unsa pa man kay kita wala man gigaid sulod sa usa ka diktadura.
******
Unang-una, sa panan-aw man gud sa Malakanyang niani, kung mangagpas kita, morag balikwaot gayud kani nga sitwasyon ug dili angayan tagaan ug dakong kumpyansa si Gov. Del Rosario tungod kay iya man nga gipabiyaan ang iyang anak nga pangampanya ug suporta para sa kandidato sa oposisyon- karon nga sayo pa, ug mas posible nga gamit ang panahon ug rekursos sa probinsyal nga kagamhanan, samtang ang gobernador mangampanya usab ug suporta para sa kandidato sa administrasyon. Nah, matunga ang Kapitolyo ani, ug posible ang tan-aw na sa mga political operators sa Malakanyang karon: namamangka sa dalawang ilog si governor. Ang Malakanyang biya dili simple lang ug pangisip.
******
Makalibog pod ang panan-aw sa publiko nianing pagdeklarar ug kusganong suporta ni AGR kang Nonoy Aquino isip kandidato pagka-Presidente, samtang tataw gayud nga si Gov. Del Rosario maka-administrasyon pa gayud labi na nga naendorsar na isip standard bearer sa Lakas-Kampi-CMD si Gibo Teodoro kinsa gisuportaran sa ubay-ubay ka mga gobernador sa nasud. Pasabot ba kini nga tungaon na lang ni AGR ug Gov. RDR ang mga politikanhong pamuo, rekursos ug mga aktibidades sa Kapitolyo ug mag -iyahay sila sa pagpangulo niani kay dili man sila pwede mag-uban tungod lagi kay managlahi ang ilang kandidato sa pagka-Presidente?
******
Pwede pa gihapon sila mag-uban sa mga kalihukan sa Kapitolyo sama sa RDR on Wheels pero di lang sila mangestorya kung kinsa ang ilang kandidato sa pagka-Presidente. Apan lisud baya kani labi na kung nagsingabot na gayud ang piniliay o human sa deadline sa filing of certificate of candidacy karong Nobyembre 30, tungod kay karon man gani ang mga lideres nila nagsugod na pod ug kalibog kung asa sila mouban- sa anak ba o sa amahan? O ngadto sa Liberal party ni Noynoy o sa Lakas-Kampi-CMD? Apan di ba morag wa may problema ang duruha sa ilang pagdagan? Mas way problema ang amahan gawas lang kung kontrahon siya ni kanhi Kongresman Tonyboy Floirendo, o ni Kongresman Anton Lagdameo human magkabikil ang duruha ka pamilya (Floirendo ug Del Rosario) sulod ra pod sa ilang clan niadtong 2007 nga piniliay.
******
Morag wa poy problema si AGR sa iyang ambisyon nga mahimong kongresman sa Distrito 1 gawas lang kung may kalit nga may political realignment ug modagan si Bise Gobernador Victorio “Baby” Suaybaguio kontra kang AGR. Matud pa ni kanhi Governor Yayong Gementiza wa siya nawad-an ug pagtoo nga di na gayud modagan si VG Baby. Una na man gud giingon ni Yayong nga modaug gayud si Baby batok kang AGR tungod kay mas nailhan ang mga Del Rosario sa Distrito 2 ug bag-o pa mipuyo sa Tagum si AGR samtang si Baby karaan nang damang sa politika. Usa pod, ang mga Suaybaguio usa sa mga pioneer nga pamilya sa Tagum.
******
Posible na nga si Comval Gov. Chiongkee Uy nga mosuporta sa kandidato sa administrasyon tungod kay si Gibo Teodoro man ang nahimong manok sa Lakas-Kampi-CMD. Sa iyang pag-organisar man gud sa Uswag Comval party giingon nga namarkahan siya sa Malakanyang nga posibleng moambakay ngadto sa oposisyon ug may estorya sa kanto nga mas gusto niya si Senador Manny Villar kaysa kang Noli de Castro. Kay si Gibo na man ug dili si Noli ang nahimong standard bearer sa administrasyon, di na mabutang sa delikado ang Comval unity nga maoy ilang kanunayng ginapasiatab.
******
Apan si kinsa kaha nila Gov. Chiongkee ug Kongresman Bobong Amatong ang kontrahon ni kanhi Gov. Joecab. “Either or pa rin” si Joecab matud pa sa usa ka magsisibya. Kung dili siya modagan pagka gobernador, pagka kongresman ang iyang daganan. Tungod kay bug-at pa gayud nga kandidato si Joecab hangtud karon, tataw nga makagasto gayud ug dako “either si Gov. Chiongkee or si Kong. Bobong” bisan pag tuod nga sa kaulahian mapildi ra gihapon si Joecab. Gibanabana nga kinahanglan nga mogasto ang makalaban ni Joecab ug di momenus sa P30 milyones aron si Joecab mapildi.
******
May kursunada na nga moparang kang Boardmember Maricar Zamora-Apsay sa pagkakongresman sa Distrito 1 sa Comval- usa ka abugado. Mideklarar na siya sa miaging semana pa. Kanhing abugado sa Ombudsman for Mindanao, university professor, kanhing organisador sa mga labor unions ug mga komunidad, kanhing aktibista kay nahimo pa ganing overall chairman sa League of Filipino Students (LFS) sa tibouk Mindanao, ug nag private practice na pagkaabugado sobra 10 ka tuig na karon. Siya si Atty. Jaime Lopoz Jr, o si Atty Jun Lopoz. Tama ra pod ni kay may mapilian na ang Distrito 1 kaysa wala. Ang election piniliay gud. Dapat may pilion ta. Kung usa ra man man ang kandidato ug wa tay mapilian sama ra pod nga atong gihikawan ang katawhan sa ilang katungod sa pagpili ug lideres nga morepresentar kanila. Apan, matud pa, di modayon ug dagan ni Atty. Jun kung modagan pa man pagkakongresman si Bise Gobernador Ramil Gentugaya.
******
TINALIGSIK: Di gusto ni Tagum City Mayor Rey Uy nga mahimong full-pledged Daneco GM si OIC GM Allan Laniba. Way labad ni mayor kay andam pod daw si Laniba nga dili mahimong regular GM….. Way kamatuoran sa taho nga may pinalitay sa boto sa pagkahimong  Daneco Board of Directors president ni Dean Briz. Gama-gama lang kani sa mga tsismoso. Di ba sir Dean ug BOD member Kirbot sa Nabunturan? …… Hinoon, giingon nga may interbensyon sa mga political kingpin sa duha ka probinsya nga mao ra poy miendorso nga mahimo silang Daneco BOD member, kay sa katapusang pag-ihap sila man ang mipili kung kinsa ang ilang gusto nga mahimong Daneco BOD president. (e-mail: chamonforte@yahoo.com)

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: