Wa mikonpirmar, wa pod mihimakak

ITSA PWERA

Ni Cha Monforte

Wa mikonpirmar, wa pod mihimakak si kanhing Compostela Valley Governor Jose “Joecab” Caballero sa alegasyon nga siya ang nagpaluyo o nagagasto sa kasong gisang-at ni Nick Bryan Patalinghug ngadto sa House of Representatives Electoral Tribunal sa alegasyon nga dili aktwal nga residente sa Nabunturan si 2nd District Congressman Rommel “Bobong” Amatong usa ka tuig sa wala pa ang miaging piniliay. Sa Ininglish pa, neither confirm, nor deny karon si Joecab kabahin sa protesta ni Patalinghug.

*****

Giingon nga miuswag na daw ang kaso ni Patalinghug sa HRET tungod kay wa man gi-dismiss ang iyang reklamo nga si Cong. Amatong nagpuyo sa Davao City ug wa sa Nabunturan gikan sa Mayo 14, 2006 hangtud Mayo 14, 2007, ang adlaw sa miaging piniliay. Si Patalinghug mireklamo nga sa Cong. Bobong wa maka-homebase sa naunang petsa.

*****

Bisag may alegasyon nga si Patalinghug gigamit ra ni Joecab kinsa gipildi ni Cong. Bobong sa makabungog nga sobra 34,000 nga biya sa ilang mga boto, sa apelyido pa lamang ni Nick Bryan kinsa taga Pantukan ug kanhi community affairs officer sa probinsya, makasilaw nga nagapatalinghug na kini atubangan sa tulo ka huwes nga gikan sa Korte Suprema ug 6 ka kongresman nga nagalangkub sa HRET.

*****

Hirit pa ni Patalinghug ngadto sa HRET: way kamatuoran nga may ice cream factory sa Purok 13, Nabunturan si Cong. Bobong nga giingon nga gihatagan ug business permit ni Mayor Macario Humol, ang usa sa mga testigo sa kongresman kay mismo ang purok chairman sa trese nga testigo ni Nick Bryan mihimakak man nga wala kini. Careful Nick, basig sige na kag kaon ug Magnolia ice cream karon nga hinatag sa nalipay nga politiko sa imong gibuhat.

*****

Ang HRET nahisusama sa usa ka korte nga anaa sa atong Kongreso. Mao kini ang naga-hearing ug nagadesisyon sa mga protesta kalabot sa piniliay. Sa nangagi, daghan nang mga kongresista nga gipalagpot sa HRET sa ilang pwesto sama sa bilyonaryong Mark Jimenez nga midaug pagkakongresman sa Manila ug nadiskubrehan sa HRET nga permanent resident pa diay sa Estados Unidos ug nagpuyo pa gyud sa iyang mansyon sa Forbes Park sa Makati ug wa sa Sta. Mesa.

*****

Wa kaestablisar si Jimenez nga siya nagpuyo na ug usa ka tuig sa Sta. Mesa, Manila sa wa pa ang 2001 nga piniliay. May probisyon man gud ang atong Batakang Balaod nga nagmando si kinsa katong modagan sa pagkakongresman gikihananglan nga nagapuyo na ug usa ka tuig sa iyang distrito nga gidaganan sa wa pa ang piniliay,

*****

Apan kaduha gihiritan sa HRET si Jimenez. Gitanggal usab siya pagkakongresman sa alegasyon nga siya mihimo ug massive vote buying mao nga midaug. Wa hinooy ing-ani nga alegasyon si Patalinghug kay igo man lang siyang mipatalinghug sa HRET nga wa nagpuyo si Cong. Bobong sa Nabunturan. Kadtong una ba.

*****

Hangtud sa pagsulat niani, gitangggong pa gihapon ang gi-donate nga van ambulance ni Councilor Raul Caballero ngadto sa munisipyo sa Nabunturan. Ang ambulansya pormal nga gi-turnover sa konsehal niadto pang Mayo 20 ngadto sa mayor inubanan sa mga department heads ug emplyedao. Hitsas na ang papeles niani (OR, CR) gikan sa konsehal. Apan wa kini gigamit sa pagdala sa mga nasamdan niadtong maduguong gabii sa pagbusikad sa granada. Girason nga wa pa maaprubahi ang deed of donation niini sa mayorya sa konseho ni Vice Mayor  Romeo Clarin maong wa kadagan niadtong Hulyo 3 nga emerhensya. Vice please lang paspasi pod intawon ang pag-aprubar niana kay anaa na man sa inyo ang bola.

*****

Apan bisag seguro wa pa maaprubahi sa imong mayorya nga mga konsehales ang deed of donation way igong rason nga di kini gamiton aron masalbar ang kinabuhi sa mga nasamdan sa pagbusikad sa granada. Babagan ba diay sa LTO ug TMG ang ambulansya sa highway panahon sa grabeng emerhensiya sa lungsod? Mao tong kaduha nagbalik-balik ang karaang rescue unit sa munisipyo sa paghatod sa mga nasamdan ug himalatyon ngadto sa ospital sa Tagum. Tungod seguro kay ang ambulansya may giprinta man sa kilid nga “Donated by Councilor Raul Caballero”? (Para sa online edition, bisitahe ang akong blog sa Internet: https://cha4t.wordpress.com)


Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: