Tong-pats sa bond flotation sa Nabunturan, Comval

Itsa-Pwera

By Cha Monforte

“Morag taas ra gyud” mao ang opinyon ni Comval Governor Chiongkee Uy sa taripa sa binulan nga arkila sa stall sa giplanong bag-ong gambalay sa palengke sa Nabunturan nga gastuhan sa P90-milyones nga bond flotation. Seguro panahon na nga mohunong sa ug manghinuklod si Mayor Macario Humol kung iya ba ning ipadayon ang bond flotation.

*****

Bisag ang gobernador man gani nakasulti nga wa pa gyud siya makakita sa feasibility study sa P90-milyones nga bond flotation sa Nabunturan. Morag na-bypass ang gobernador sa basic protocol nga i-copy furnish bisan man lang for information purposes labi na nga dako kaayo ning utangon sa mayor sa iyang katapusang termino. Tama ka gob sa imong opinyon nga ang mobayad na sa utangunon nga P90 milyones mao na ang sunod nga mayor sa lungsod.

*****

Di man seguro modagan ug mayor ning si Bise Mayor Romeo Clarin kay siya ug ang iyang mayoryang mga konsehales, sama sa mayor, paspas pa man sa alimpulos, nga masugdan na dayon ang P90-milyones nga bond flotation bisag ang katawhan sa Nabunturan wa pa gyud makahibalo unsa ning bond flotation.

****

Niadtong Mayo pod paspas nga mihimo sa second ug third reading sa usa ka sesyon human sa giingong lutong macao (luto na ni macao) nga public hearing sa bond flotation diin daghang mga apektado ang mihatag ug oposisyon sa bond flotation. Way gihimong konsiderasyon sa oposisyon si VM Clarin ug ang iyang 8 ka konsehales. Si Konsehal Raul Caballero ug Alfonso Tabas Jr lang ang wa mopabor samtang si Kon. Editha Arangcon mi-absent ug tuyo sa maong sesyon.

*****

Base sa feasibility study sa bond flotation, sa minimum kung ang gamay nga manindahay ug bulad mokuha ug 10 metro kwadrado nga stall moabot na ang iyang arkila matag bulan sa sobra P9,000. “Di gyud ni namo kaya,” matud sa usa ka market vendor. Aron siya makakuha ug stall, mo down pa gyud siya ug katulo ka pilo anang kantidara o 3-months advance rental, plus dugang nga katulo na pod ka pilo o 3-months deposit. O sobra P50,000. “Asa man ni mangita ana?” dugang pa sa market vendor.

*****

Unsa ba ning bond flotation? Usa gihapon kani ka pagpangutang dili sa banko apan pinaagi sa mga ahente nga mangita ug mopalitay sa bond or sertipiko nga i-issue sa lokal nga kagamhanan aron makakuha ug kwarta para gamiton sa pagbuhat ug bag-ong public market building.

****

Klase-klase ang mga tong-pats ug obligasyones sulod aning ambisyosong proyektong bond flotation sa Nabunturan. Sa drawing pa lamang, mogasto na ang lungsod ug P6.5 milyones- para sa architectural ug engineering design. Drawing pa lang ni ha. Base sa pag-estudyo sa Local Finance Committee (LFC), ang interest sa utang nga pagabayran (wa pay labot sa kapital) mokabat na sa P19.8 milyones sa una ug ikaduhang tuig. Matag tuig sulod sa 7-10 ka tuig mopagawas ang lungsod ug dili momenus ug P12-15 milyones gikan sa gikolateral nga Internal Revenue Allotment sa lungsod ngadto paingon sa pagbayad sa utang. Aduna pay matawag nga dili angayan nga mga galastuhan nga mokabat sa P5.4 milyones alang sa mga consultants, ahente, underwriter ug guarantor. Matud pa sa LFC, P19.8 milyones ang kadako sa biya sa bond float ikumparar kung mangutang na lang ang lungsod sa Development Bank of the Philippines. Sa maong proyekto mogasto ang lungsod ug P52,841 kada metro kwadro base sa 1,700 metro kwadrado nga land area sa giplanong gambalay sa bag-ong merkado. Wa pa ko kabalo kung ngano man gyud nga gusto ipadayon ni Mayor Humol, Vice Mayor Clarin ug sa ilang 8 ka konsehales ang ambiyosong proyektong bond flotation. (Para sa online edition, bisitahe ang akong blog sa: https://cha4t.wordpress.com)

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: