Olano “way nahimo sa Tagum”, YG “dying moon” na
Ni Cha Monforte, Rural Urban News
feb 15
Gimakmak isa isa ni Tagum Cty Mayor Rey Chiong Uy (Liberal Party) ang iyang mga katigi sa pagkamayor sa syudad samtang iyang gitubag ang giitsang dagkong isyu batok sa iyang administrasyon nga kabahin sa buluhisan, sa ginamugnang bag-ong city hall ug patay sa syudad.
Sa usa ka pakighinabi, si Mayor Uy unang mipangutana kang Congressman Arrel Olano (independent Lakas) kung unsa ba gayod ang iyang nahimo alang sa kalamboan sa Tagum isip pribadong tawo ug kaparte niini samtang bag-ohay pa nga gitaho nga ang kongresman maoy ikatulo nga may pinakadakong gasto sa tuig 2008 sa Kongreso.
Sa mao gihapong pakighinabi, gimakmak usab sa mayor si kanhi Gobernador Gelacio “Yayong” Gementiza (independent) nga nagsige lang ug pag-endorso kang Olano nga kung dili siya botaran ngadto na mobotar kang Olano ug dili ngadto sa mayor o sa pagpakatag nga mo-withdraw daw si Yayong pabor kang Olano.
“Isyu na sa tigulang, kay gusto lang niya makakuha ug endorsement fee kang Olano, pangwarta gihapon na iyaha,” matud pa ni Uy.
“Nakalimot siya nga ang iyang gidaganan ang pagka mayor ug dili pagka kanhi gobernador,” paghulagway pa sa mayor ngadto sa daghang gipapilit nga mga kalendaryo ni Gementiza diin anaa ang iyang hulagway ug titulong Former Governor.
Giadmitar hinoon sa mayor nga siya napildi kaduha ni Gementiza niadtong 1992 nga away nila pagka bise gobernador sa dakong probinsya sa Davao del Norte ug sa 2001 nga away nila pagka mayor sa Tagum. “Wa nato na gilimod, apan tungod kay kaniadto si Yayong mao pa ang shining star apan karon dying moon na siya”.
Apan mipaklaro na usab niadtong Sabado si Olano sa usa ka press conference nga igo lang siyang mituman ug sakto sa pagpaklaro sa iyang nagasto ug kini nahasulod sa gitugutan nga badyet sa opisina sa mga kongresman ug tama lang sa iyang daghang nahimo pagka senior kongresman ug isip chairman sa rural development committee ug miyembro sa impluwensyadong komitiba sa oversight.
Mihatag usab si Olano ug “inisyal” pa lang nga listahan diin anaa ang iyang mga nahatag nga proyekto syudad.
Di pa dayon mahibal-an ang tubag ni Gementiza sa pagsulat niani, apan una na siyang namulong nga daghang mga negosyante ang giingong wa na himuot sa giingong pataka nga pagpataas sa mga buluhisan sa syudad panahon sa administrasyon ni Uy.
“Isyu ra na nila, ug kining nagayawyaw gahi lang gyod mobayad ug buhis,” tubag pa sa mayor.
Una nang gidepensahan kaning isyoha nga gamay ra gayod sa sektor sa negosyante ang nagareklamo kabahin pagtaas sa buluhisan nila, ug ang nakolektang mga buwis miadto ra pod ngadto sa daghan ug makita gayod nga mga dagkong proyekto ug kalamboan sa syudad sulod sa administrasyon ni Uy.
Kabahin sa isyong patay o sa mga panghitabong extrajudicial killings sulod sa syudad, matud pa sa mayor: “Kanang mga nangamatay puros na mga maldito, unya atong pasagdan? Unsay gusto nato? Ang mga inosente ug dili mga maldito ang mangamatay? Nalipay pa man gani ang hingtungdan nga namatay ang maldito.”
Sa dakong gasto sa ginahimong moderno ug bag-ong city hall didto sa Apokon, si Mayor Uy nagkanayon: “Gwapo na kay kas-a lang ang gasto ug kaya nang mabayran ang loan (para ana). Di man na nako mabitbit kung di na ko mayor o kung sila na ang mayor.”
Matud pa sa mayor wa siya mahadlok sa iyang mga karibal pagka mayor kay matud niya human na siya kaagi ug grabeng kalisud nga kadaugan niadtong 2004 nga piniliay nga “me against them” kay matod niya niadtong eleksyona dili siya incumbent ug gitabangan siya nila “Yayong, (Baby) Suaybaguio, Floirendo, Olano, (Governor) RDR ug uban pa” apan “we still survive”.
Wa naapil ang usa pod ka independente nga kandidato pagka mayor Cesar Cuntapay, ang kanhi police investigator ug negosyante, sa mga tirada sa mayor. (Cha Monforte/Rural Urban News)
Filed under: tagum elections 2010, tagum elections 2010
Recent Comments