nov 12
Bag-ohay pa lamang gipagawas sa Regional Trial Court Branch 3 sa Nabunturan ang writ of preliminary injunction nga nagmando sa mga opisyales sa munisipyo sa Nabunturan sa dili sa paghimo ug mga lakang sa pag-implementar sa P90-milyones nga bond flotation nga mogasto unta sa katukuran sa bag-ong public market building sa lungsod.
Si RTC Executive Judge Hilarion Clapis Jr mipagawas sa maong orden sa preliminary injunction penetsahan niadtong Nobyembre 4 ug niadtong miaging adlaw lamang kini gi-serve ngadto sa mga tulo ka mga complainant nga residente sa lungsod ug ngadto kang Mayor Macario Humol, Vice Mayor Romeo Clarin, ug mga konsehales nga mipabor sa maong proyekto nga sila Darwin Tan, Iluminada Cabuga, Eduardo Minoza, Vivencia Secuya, Cheryl Asion, Felipe Masambo ug Sangguniang Kabataan representative Jennifer Gamao.
Si Judge Clapis sa iyahang desisyon sa Special Civil Case No. 898 para sa injunction with application for writ of preliminary injunction kabahin sa maong proyekto sa lokal nga kagamhanan nagkanayon nga ang mga complainants nga si Charlie Monforte, Emilio delos Reyes ug Councilor Alfonso Tabas supisyente nga nakaestablisar nga adunay dakong damyos ug di na mamaayo nga kadautan nga mahimo sa maong bond flotation kung kini maimplementar, bisag tuod temporaryo pa ang pagpahunong niini samtang ang prinsipal nga isyu ug aksyon kabahin sa merito sa bond flotation hatagan pa ug pinal nga hukom sa korte.
Kahinumduman nga ang maong tulo ka complainant unang nangayo ug injunction sa RTC Branch 3 sa ilang gusto nga ipahunong ang P90 milyones nga bond flotation nga gimando sa Municipal Ordinance 2008-10 tungod sa giingong dakong pagkadis-adbantahe sa gobyerno ug pagkalas-kalas sa kwarta sa katawhan tungod sa giingong dagkong mga di angayang mga gasto ug intereses sa bond flotation ikumparar sa simpling pag-utang lamang sa bangko.
Giingon pod sa reklamo sa mga complainant nga ang P90-milyones nga bond flotation makapadislokar sa daghang mga market vendors nga moresulta ngadto sa pagkawala sa ilang panginabuhian, trabaho ug kita, samtang giingon nga kini makahatag usab ug ekonomikanhong kadautan ngadto sa ordinaryong lungsuranon sa Nabunturan.
Niadtong Pebrero ang mga hingtungdan nga mga opisyales miduso sa ilang motion to dismiss sa maong reklamon sa rason nga kini may lack of jurisdiction ug lack of cause of action.
Apan sa Marso mihimo ug opposition ang mga complainant sa maong motion to dismiss sa mga hingtungdang opisyales human sa mga hearing sa pagtuki sa mga merito sa isyu sa bond flotation diin kini gitambongan sa mga resource persons nga mga opisyales rehiyunal gikan sa Dept. of Finance, Dept of Budget and Management ug mga lokal nga opisyales gikan sa Local Finance Committee sa lungsod.
Wa naapil sa orden sa injunction sila Councilor Raul Caballero ug Councilor Editha Arangcon tungod kay apil sila nga miiposar sa ordinansa sa P90-million bond flotation. (RUN)
Filed under: nabunturan mayor, nabunturan mayor, nabunturan officials
Recent Comments