BALITA: New Year’s wish ni CO: “Daghang trabaho, negosyo para sa Tagumenyos sa 2010”

dec 31

“Daghan pang katrabahoan sa katawhan ug daghan pang mga negosyo nga moabot sa Tagum,” mao ang dakong 2010 New Year’s wish ni City Mayor Rey Chiong Uy.

Matud pa sa mayor, dako gayod ang iyang pasalamat sa Kahitas-an nga daghang mga negosyo nga misulod sa iyang syudad karong tuiga sanglit nakahatag gayod kini ug daghang mga trabaho ug panginabuhian sa iyang katawhan ug usab sa pagkolekta sa syudad ug daghang mga buwis nga miadto ra pod sa daghang mga imprastraktura ug serbisyo sosyal alang sa dugang kalamboan sa City of Palms.

Mismo sa estadistika sa Department of Trade and Industry hangtod sa miaging bulan nagpakita nga misaka ang kadaghanon sa medium ug small businesses sa 58 porsyento gikan sa tuig 2008 sanglit nagapadayon gayod ang syudad sa iyang papel sa rehiyon isip usa ka establisado nga business service center samtang kini nagaserbisyo sa Davao Oriental, Compostela Valley apil na ang naa sa norte nga mga lungsod sa Agusan del Sur.

Mibutyag usab ang mayor nga mopadayon na ang konstraksyon sa unang mga bulan sunod tuig sa Gaisano Mall ni James Gaisano, silingan sa NCCC Mall Tagum, nga naa nahimutang kilid sa national highway human natapos ang legal issue kabahin sa yuta nga gitukuran niini. Kini human sa pagbukas niadtong Disyembre 10 sa Gaisano Mall ni Benito Gaisano didto kilid sa highway paingon sa Mati, Davao Oriental.

Ang pagnegosyo sa mga Gaisano sa syudad nakahatag na pod ug oportunidad sa negosyo aron makakuha usab ug daghang buwis alang sa syudad.

Sulod sa duha ka termino pagkamayor ni Uy naobserbahan siya nga kusganong nagalusad ug mga makit-ang mga dagkong imprastraktura ug programa sama sa paggama ug bag-ong City Hall didto sa Apokon, pagpagwapo sa kadalanan, pagpanghimo ug parke subay sa pagka City of Palms sa Tagum, pagpang-abre ug oportunidad sa pagpagawas sa ekspresyon sa pagkagawasnon katawhan sa natad sa kultura ug musika inubanan sa hugot nga pagmentenar sa kalinaw subay sa pagposisyon sa syudad nga mahimong usa ka livable city o gwapong puy-an nga syudad samtang padayon ang kampanya sa iyang kagamhanan sa pagpaagni sa mga investor nga mohimo ug negosyo ug mobobo ug kapital sulod sa syudad.  (Cha Monforte/Rural Urban News)

Filed under: mayoy rey uy, mayor rey uy tagum