TSA PWERA
Ni Cha Monforte
FEB 27
Dugay na nagsugod ang pangumpanya sa lokal nga mga kandidato. Dugay na na man gud silang naga-handshaking sa mga mga barangay. Ingon pa sa Comelec karong Marso 26 pa ang sugod sa kumpanya nila. Estoryahi!
******
May hungihong niadtong Miyerkules nga moambak na ang nag-inusarang Lakas-Kampi-CMD nga bando probinsyal sa Rehiyon XI ni Compostela Valley Governor Arturo “Chiongkee” Uy ngadto sa sabakan ni Manny Villar gikan kang Gibo. Wa lang nadayon. Ambot kung ngano? Mikaryo seguro ang numero uno fan ni Gibo sa probinsya nga si Congressman Rommel “Bobong” Amatong. Nah, kung madayon ning taho nga mag-Manny Villar na si Gov. Chiongkee, segurado kong mawad-an na ug fans ning si Cong. Amatong nga mga mayores gawas lang sa iyang ig-agaw nga Maco Mayor Voltaire Rimando ug Pantukan Mayor Tok Sarenas. Gikan man gud sa kabus si Gov usa nadato susama kang Villar. Si Cong. Bobong man gud namat-an ang kaharuhay sa kinabuhi sama ni Gibo.
******
Sa Davao del Norte, di lang handshaking ang ginahimo sa mga kandidato. Anaa na pod ang pangumpanyang pagpangdaut pinaagi sa text. Naigo na sa black propaganda text messages si kandidato pagka kongressman Anthony G. del Rosario (AGR) sa Distrito 1, Tagum City Mayor Rey Chiong Uy ug Congressman Arrel Olano. Si AGR gi black text nga stage 4 na ang iyang hodgkin lymphoma cancer bisag dugay na siyang naayo, si Mayor Uy gi black text nga naghimo ug political lobotomy bisag wala, si Cong. Olano gi black text nga gastador bisag dili. Hinimoan na pod kini sa Malicious Text Brigade (MTB) sa probinsya?
******
Sa miaging tuig gi black text sa MTB si Davao del Norte provincial administrator Rufo Peligro ug General Services Officer Sammy Sanchez nga giingong nangawkaw bisag ilang gihimakak ug sakto ang alegasyon nga dili tinoud. Basura daw ug wa nagpakita ang nag black text ug way pruweba, way ebedensya, pwe!
******
Karong modernong panahona, ang pagpataka ug gamit sa abanteng teknolohiya mointerbenar ug moapil-apil na sa atong normal nga kinabuhi. Di man nato gusto makadawat ug black text, ug mobasa man gayod kita kung may mo text kanato, mao nang gikinahanglan gayod nga maantigo na kita sa pagtratar nianing dili maayo nga mga impluwensya tungod sa abanteng teknolohiya. Busa angayan kanunay moanalisar kung tinoud ba o dili ang mga pagpangdaut nga mga text messages nga nadawat sa inyong mga cellphone. Basi pod diay tinoud, noh?
******
Matawag nga usa pod ka equalizer o nagahatag ug kaangayan ug pagkagawasnon sa katawhan kining teknolohiyang cellphone nga nagadepende sa atong mga kamot. May mga di man gud maestorya ug ma-imprinta tungod sa kahadlok. Sama kini sa teknolohiyang Internet diin libre ang tanan sa pagpagawas sa ilang gibati- 100 percent.
******
Si kandidato pagka presidente Manny Villar gi black text pod nga nakigsabot na kang Presidente GMA nga himoong Speaker sa Kongreso human sa eleksyon o di si GMA gukdon na sa administrasyon ni Villar. Kana kung ma Presidente gyod si Villar. Pasabot nga ang kiss of death ni GMA moadto na kang Villar ug dili na ngadto kang Gibo kinsa maoy presidential standard bearer sa Lakas-Kampi-CMD. Nah, tungod sa text, nawad-an na hinoon ug daghang boto si Villar.
*****
Daghang mga klase nga mga pangampanyang text messages ang nagalupad-lupad karon. Anaa ang negatibo gayod, anaa ang positibo o pagpromotar sa kandidato. Anaa ang mga bakak sa third party aron masuspetsahan o madaut ang gi-target nga kakontrang partido o kandidato. Mao nang kung may madawat kamong political text messages, basaha usa ug kung kini tan-aw nimo dili tinoud, ingna nga “estoryahi!”, ug kung tan-aw nimo tinoud gayod, nan ayaw pagkinuripot ug load ug ipang forward na dayon!
******
TINALIGSIK: Si Comval District 1 Boardmember Atty. Dexter Lopoz, nga reelectionist for second term, mi Top 2 gihapon sa bag-ong survey. Consistent lang siya kay mi Top 2 man gud siya sa bar exams niadtong tuig 2000…. Si Davao del Norte Vice Governor Baby Suaybaguio Jr kalmante lang sa iyang pagpasubli. Seguro wa pa katarog si Boardmember Dangpanan Israel sa iyang pagpang emcee…. May maayong panglantaw si kanhi Judge Justino Aventurado nga midagan pagka bise mayor sa Tagum. Gusto niyang i-review ang mga lehislasyon diin nabug-atan ang mga Tagumenyo. Daghang nakaangay. Seguro tungod kay giingong rubber stamp vice mayor si Allan Rellon…. Kabag-ohan sa lungsod ang panawagan ni Fr. Em-Em Luego nga midagan pagka mayor sa Sto. Tomas, Davao del Norte. Gusto niyang may public college ug public hospital ang lungsod. Tungod man gud kay si Mayor Max Estela nanag-iya ug pribadong kolehiyo ug pribadong ospital. (e-mail: chamonforte@yahoo.com)
Filed under: Judge Justino Aventurado, Judge Justino Aventurado
Recent Comments