Ni Cha Monforte, Rural Urban News
feb 10
Sa pagsugod sa campaign period sa mga national candidates kagahapong adlawa, mitahag usab ug direktiba si Davao del Norte police director Jose Pante ngadto sa iyang mga chief of police sa way puas nga pagbantay aron maseguro nga magmalinawon ang piniliay karong Mayo 10 sa probinsya.
Sa usa ka command conference kagahapon sa buntag didto sa Provincial Police Office, giila sa karaang tawag nga barracks sa Tagum City , si PSSupt. Pante mimando sa iyang mga kadagkoan sa kapulisan sa probinsya nga sa kanunay nga respetohan ang mga katungod sa sibilyan samtang sila padayon nga todong magaimplementar sa gun ban ug magahimo ug gun ban checkpoints subay sa mando sa Comelec.
Sa pagpanguna ni PSSupt. Pante detalyadong gilatid sa mga opisyales sa kapulisan ang plano sa pagpanalipod ug pagbantay aron magmalampuson ang umaabot nga piniliay sa probinsya.
Sa dugang nga pagpasabot ni PSupt. Jessie Estrada, assistant provincial director for administration, sa usa ka pakighinabi, iyang giingon nga sa pag-implementar sa gun ban checkpoints ang “plain view doctrine” maoy mopatigbabaw nga operating procedure niini.
Pagsaysay ni PSupt. Estrada, heneral nga magatan-aw lang ang naga inspection nga pulis ug kini dili mohimo ug pisikal nga pagrikisa o body search o pagrikisa sa butang gawas lang kung ang pasahero suspetsyoso o dili ba kaha “may tawag” gikan sa kaubanang pulis o gikan sa intelligence nga gikinahanglan nga irikisa ang mga pasahero.
“Depende kana sa pag-analisar sa sitwasyon sa nag man (nga pulis sa checkpoint),” dugang niya.
Sulod sa gun ban rules, ang mga kandidato sa piniliay gitugotan lamang nga may armado nga bodyguard nga dili mosobra sa duha.
“Sila naka proper uniform ug may valid authority,” dugang pa ni PSupt. Estrada. (Cha Monforte/Rural Urban News)
Filed under: Davao del Norte police director Jose Pante, PSupt. Jessie Estrada, Davao del Norte police director Jose Pante, PSupt. Jessie Estrada
Recent Comments