OPINYON: SINAMPOKAY SA MGA KANDIDATO SA BYERNES NA

Ni Cha Monforte, Rural Urban News

MARCH 23

Human sa hataas nga higayon nga miabot ug halos upat ka bulan gikan sa Disyembre kanus-a sugod mihimo ug tago nga pangampanya ang mga kandidato, ug kining kadugayon una sa kasaysayan sa pinilay sa nasud, karon na gayong umaabot nga Biyernes magsugod ang opisyal nga campaign period para sa mga lokal nga kandidato.

Tungod sa automated election maong nasayo kaayo ang filing sa certificate of candidacy sa mga kandidato hangtod niadtong Disyembre 1, de modo nasayo usab ang tagong pangampanya nila pinaagi sa naguspaw na nga pagpang handshaking kasagaran kanila, nga sa pagkatinoud usa ka tataw nga akto sa pagpanglapas sa gidili nga premature campaigning subay sa balaod sa Commission on Election.

Gawas sa handshaking, nagahimo usab ang mga tikasan nga mga kandidato ug pagpangtapot ug mga greetings nga poster, streamers, tarpaulins ug mga anunsyo- wa lang ang mga pulong nga: VOTE, REELECT, IBOTO PAGKA ___, ug uban pa. Estoryahi! Tataw nga mga pagpanglapas usab kini sa Fair Election Act.

Apan naobserbahan nga sa Davao del Norte ug Compostela Valley sagad sa mga kandidato wa nagpapilit kay hadlok ma-disqualify kay basig mawad-an ug panginabuhi, sayang pod, samtang gitan-aw pod nila nga “maayo man nga panginabuhi ang pagkapili isip opisyal publiko.” Estoryahi! Dugay nang nahalin ang saad nga “midagan ko para moserbisyo sa katawhan, sa haring lungsod.”

Sa miaging semana, naobserbahan na ning mantalaan ang pag double time na sa mga lokal nga mga kandidato nga mahuman na ang ilang mga handbills, tarpaulin posters, flyers, jingles, t-shirts, vests ug ubang panginahanglan kay karong Byernes, Marso 26 magsugod na gayod ang 45-diyas nga sinampukay, karambola sa mga lokal nga kandidato sa pag-agni sa mga botante nga moboto kanila alang sa Mayo 10 nga piniliay, human niadto pang Enero nagsugod ang kampanya sa mga national ug partylist candidates.

Sa Tagum City, naobserbahan nga mipataas na ang level sa pagpangampanya alang sa nag-una ug paborito sa masa nga si Senador Noynoy Aquino kay dili kurap ug busa walay mahirap matod pa sa iyang mga political propaganda. Tataw ang pagbahas-bahas sa kadalanan sa mga multicab sa Liberal Party nga nagbutang ug akronim SEGURADO, nga nakapaklaro sa kusganong kampanya para kang Noynoy ni kanhi bise gobernador Anthony Rafael del Rosario, ang sureball winner na pagka kongresman sa Distrito 1 samtang padayong absenot ang iyang kalaban nga si kanhi bokal Emily Alvarez (ambot kung nganong midagan pa man batok sa mga higanteng Del Rosario).Del Rosario Segurado gayod. Emily estoryahi!

Grabe na usab ang pagpamanday sa mga kahoy nga mopatindog sa mga 2 feet x 3 feet maximum-sized tarpaulin nga ibutang sa mga Comelec common posting area, apan naobserbahan nga may mga wais nga kandidato nga gisumpay-sumpay ang ilang 2 x3 tarpaulin maong midako na ug tataw nga nalahi na sanglit usa kini ka pagpahimulos nga lapas sa proseso sa pangampanya sulod sa Fair Election Act. Estoryahi!

Sa Tagum City, ang Nobody Nobody but Uy nga mga poster nagkalat na samtang giunhan ang tanang kandidato sa Davao del Norte ug Comval ni kanhi pulis opisyal Cesar Mancao sa iyang greetings poster nga gipatapot sa mga balay-balay niadto pang Disyembre (beh, isahan mo ni Boy kay wa man siya gisupalpal sa Comelec tungod ra pod kay wa siya mahadlok nga ma-disqualify ug mawad-an ug panginabuhian sa pagka opisyal publiko. Estoryahi!).

Ang Takasan Green Ordinance sa Comval nga nagdili sa tanang advertisement materials nga ilansang sa mga punoan sa kahoy kay unsa man ang sala niini nga gilansangan man ninyo Gibo Teodoro, Manny Villar, Erap, Binay, Bongbong Marcos kinsa nag-una na paglapas sa ordinansa ni Boardmember Moran Takasan. Estoryahi! National candidates pa gani, mas pa ang daghan kaayong mga local candidates.

Karong Byernes gihulat ang pagsinampukay sa mga tarpaulin ug poster, mga rekorida nga nagapatogtuod ug jingles sa mga kandidato sa atong kadalanan, kabalayan ug mga punoan sa kahoy, mga poste, mga kural sa di mapugngan nga pagpanglapas sa mga bentahosong politiko (puera delos buenos ha, estoryahi!).

Gihulat usab ang de impakto nga mga taas nga motorcade ug caravan sa mga may makinarya ug may pondo nga mga linya ug mga kandidato, apan matod pa sa mga obispo, estoryahi! kay ilang giawhag ang mga botante nga dili magpatintal sa mga kandidato nga nagapakita na ug hambog nga mga palabas sama sa motorcade nga giubanan ug daghang mga naggilak-gilak nga mga sakyanan- mga pickup nga Navarra, Fortuner, mga kotse ug uban pang wa mailhi apan makit-an lang sa masa, estoryahi! unsa ning piniliay lumba sa mga gwapong sakyanan? samtang padayong nagkagidlay ug nag-ilaid- GUTOM! ang katawhang Pilipino, ug tataw nga human anang pagpanghambog sa mga datong kandidato, inyo na usab nga ilaron ang katawhan sa inyong mga matam-is nga mga baba panahon sa inyong mga rally ug pulong-pulong nga ang utlanan diay sa inyong pagpapili mao ang PAGLUGOS sa kaban ng bayan, ug kung dili gani kining mga bulala nga dila mosalir ug kung way milagro kining pinakaunang automated election sa nasud (sama niining “Ako ang Simula” nga kampanya sa ABS-CBN), inyo na usab nga bayran ang mga botante ug tag P200, P500 aron tuison na usab ang anaa sa kasingkasing nga mga maayong kandidato sa mga botante. Estoryahi! (Cha Monforte/Rural Urban News)

Filed under: DAVAO DEL NORTE COMVAL ELECTION, COMVAL ELECTION, DAVAO DEL NORTE ELECTION