TSA PWERA
Ni Cha Monforte
feb 9
Atat na atat na gayod ang nga empleyado sa Davao del Norte Electric Cooperative nga makadawat sa gisaad nga usa ka bulan nga sweldohan nga performance bonus nila tungod sa ilang kolektibong kahimoan nga may gradong A+ ang Daneco sa paghuman sa 2009. Kung A+ ang grado pasabot nga naka first honor ang Daneco. Maayo ang performance sa mga Daneco employees, apan imbis nga A+ nahimo na hinoong E-wan ang ilang bonus hangtod sa kasamtangan.
*****
Sa Nobyembre 14 pa sa miaging tuig naaprubaran ang resolution numero 267 sa Daneco board of directors (BOD) nga maghatag ug duha ka bulan nga sweldohan nga performance bonus sa mga empleyado, ug duha ka bulang per diem para sa mga miyembro sa BOD. Kung usa lang gani ka bulan ang performance bonus kinatibuk-ang mokantidad na kini ug sobra P4 milyones. Ang problema kay asa man mangita ug pondo niani kay ang surplus lang nga kita sa Daneco sa 2009 mikantidad lamang ug P1.6 milyones? Matud pa ni board president Dean Briz. Je je je gyod sila directors Roman Calicdan ug Dan Gervacio kinsa miisponsor sa maong resolusyon.
*****
Kada miyembro sa Daneco BOD may tag P9,000 nga per diem kada bulan, samtang nagkadaiya ang sweldo sa mga empleyado- syempre kung taas ug posisyon dako ug sweldo, kung janitor lang gamay ra pod, basta ang pinakadako sa mga empleyado moabot ug sobra gamay P30,000 ug mga department managers sobra P20,000. Salamat na lang mipakanaog niadtong Disyembre 8, 2009 ug usa ka direktiba ang National Electrification Administration- ang bossing sa tanang kooperatiba sa sugang dagitabnon- nga dili pwede ang duha ka bulan nga sweldohan ug per dieman, pwes tag isa lang ka bulan sila. May na lang may isa kaysa wala.
*****
Matud pa ni Briz, kinatibuk-ang mokantidad ug P2,267,065.22 ang performance bonus para sa mga ordinaryong empleyado. Short gihapon ang Daneco. Wa pay labot diha ang
P1,819,821.60 para sa mga tag-as ug posisyon ug mga BOD members. E-wan asa mangita ang Daneco ug pondo nianing P4,086,886.82 suma kantidad?
*****
Para sa mga atat na atat nga mga empleyado, naka cheke na kining P4,086,886.82 ug anaa na sa lamesa ni Briz. Ang nakaapan kay dili niya pirmahan kay wa may pondo, wa may supplemental budget nga gisubmitar si OIC general manager Allan Laniba ngadto sa BOD. Giingon nga gipalangay-langay lang gyod ni Briz ang pag-release sa performance bonus sa unsang di mahibal-an nga motibo, o basig di lang gyod niya mahimong bida si Laniba? Apan may rason pod biya si Briz kay gamay lang ang surplus sa miaging tuig ug wa may pondo. May natigom pod nga mga lugi sa Daneco gikan sa tuig 2002 hangtud sa tuig 2006, ug ang P1.6 milyones nga surplus sa 2009 di sarang ikatapal sa natigom nga mga lugi.Mora na hinoon mi nahimong mga kontrabida ani, matud pa ni Briz.
*****
Aw diay? Kay may net loss man gyod ang Daneco kung isumada ang kita versus mga gasto gikan sa 2002 hangtud 2009, dili na lang seguro nato ipugos nga i-release ang performance bonus alang sa kaayuhan sa mga konsumante sa Daneco, kay kung i-release gayod kani, di madugangan na pod ang pagkalugi sa Daneco. Malamdagan unta ang mga empleyado nianing pagsigeg awas sa dugo sa Daneco. Mo-donate unta ug dugo ang mga empleyado ug opisyales sa Daneco kaysa tabangan kinig sopsop ug dugo kay morag nangluspad na biya ni.
*****
TINALIGSIK: Sa pagkatinoud, matud pa sa atong bubuwet, gireserba alang kang last-termer Arrel Olano ang usa ka posisyon pagka boardmember o pagka campaign manager sa linya ni Davao del Norte Governor Rodolfo del Rosario sa Liberal Party…. Lain pod tan-awon nga ang usa ka mograduatetay nga kongresman mopaubos ug dagan pagka boardmember kay tan-awon siya nga nanginabuhi na lang sa politika. Mao nga midagan na lang si Olano pagka mayor sa Tagum City …. Puli kang Olano pagka boardmember si kanhi boardmember Shirley Aala ug kini giduso ni Olano. Si Aala gi-junk na ni City Mayor Rey Chiong Uy nga di suportaran kay tataw nga maka Olano….. Nagapadayon ang mga kahimoan ni Comval Boardmember Atty. Dexter Lopoz, ang Top 2 sa 2001 nga bar exams. Daghan siyang mga nahimong ordinansa probinsyal alang sa Distrito 1, samtang top usab si Boardmember Moran Takasan sa Distrito 2. Maayo nga mag-tandem ang duruha sa pangumpanya, galing lang kay magkabilaan man ang ilang mga distrito…. Nagpadayon gihapon ang CELLBEER nga politiko sa Nabunturan, Compostela Valley sa iyang imahen sa publiko. Kung di man gani CELLphone ang gigunitan sa iyang kamot samtang nanabako BEER pilsen ang gunit niani. Kinsa ni siya? Kauban ni siya sa pildidong linya ni kandidato pagkamayor Raul Caballero. Delikado mapagan ka ana niya ‘sehal nag-una pa biya ka gihapon sa survey. (e-mail: chamonforte@yahoo.com)
Filed under: Comval Boardmember Atty. Dexter Lopoz, dan gervacio, daneco, roman calicdan, Comval Boardmember Atty. Dexter Lopoz, dan gervacio, daneco, roman calicdan
Recent Comments