TSA PWERA
Ni Cha Monforte
Red carpet treatment
Tataw na gayud nga grabe ang suporta nga gihatag ni AGR – Anthony Rafael G. del Rosario (AGR) sa tandem ni Senador Noynoy Aquino ug Mar Roxas. Gitawag nga red carpet treatment ang gihatag sa Kapitolyo sa Mankilam, Tagum City niadtong Biyernes sa launching sa Noynoy Aquino for President Movement (NAPM) sa Davao del Norte. Matud pa, daghang mga politiko ang misugat kang Nonoy ug Mar, samtang init gayud ang pag-welcome sa kanila ni Governor Rodolfo del Rosario, ang amahan ni AGR. Matud pa libre usab ang kaon sa mga misugat nga mga estudyante ug katawhan sa klase-klaseng sektor.
*****
Seguro out of courtesy lang isip amahan sa probinsya nganong mihatag ug usa ka red carpet treatment si Gov. Del Rosario, nga taga Lakas-CMD Party, ngadto sa mga kandidato sa oposisyon. Una nang miingon ang gobernador nga di niya mapugngan ang iyang anak nga mo-oposisyon tungod kay iyang girespetuhan ang kagawasan sa iyang anak sa pagpili kung kinsa ang iyang suportaran pagka-Presidente ug pagka-Bise Presidente.
******
Human sa pagbisita nila Senador Noynoy ug Mar Roxas sa Liberal Party sa Tagum City, mibaniog dayon ang mga estorya nga nag-oposisyon na ang gobernador ug miuban na kani sa panaw sa politika sa iyang anak. Apan dili pa kani makonpirmar dayon ug gani may taho nga nag Lakas-Ramos wing ang gobernador. Kung mao kani ang posisyon sa gobernador, posible nga ang liderato sa na merged nga Lakas-Kampi-CMD o ang Lakas nga Malacanang wing makuha na sa mga Floirendos ug Lagdameo. Hangtud karon matud pa aduna gihapoy konplikto tali kanila ug sa Del Rosario.
*****
Pagarpar sa politikang yellow si Boardmember Antonio Lagunzad kay matud pa nahimo kaning mayor sa Tagum tungod kang Presidente Cory Aquino. Morag nakapuntos ang bokal niadtong pag-abot nila Noynoy sa Tagum tungod sa kabaga sa mga tawong miapil sa NAPM. Tama na segurong mobulag na si Lagunzad sa Lakas ug mag Liberal na. Ang nakaapan man gud kaniya kay kusganon siyang maka yellow karon sa pagsuporta kang AGR apan dako pod nga makaadministrasyon kay sigeg deklarar nga dakong loyal lagi siya kang Gov. Dolfo. Consistent lang siya kay may alegasyon man gud nga balingbing ug doble kara na gayud ang politika ni Lagunzad sa una pa.
*****
Mas maayo pa ang gibuhat ni AGR nga miresayn gayud sa Lakas sa iyang pagdeklar nga modagan sa Kongreso isip independente nga kandidato. Karon tataw na siyang oposisyong dako. Ang nakaapan lang pod kay wa pa miresayn siya isip empleyado (provincial sports coordinator) sa kagamhanang probinsyal samtang gigamit niya ang Kapitolyo sa paghatag ug suporta sa mga kandidato sa oposisyon.
******
Nakit-an usab si Compostela Valley Governor Arturo “Chiongkee” Uy didto sa Kapitolyo sa Mankilam nga misugat usab kang Noynoy ug Mar. Apan sa iyang pamahayag sa usa ka text message kanako, miingon siya nga miadto lang siya tungod kay giimbitar siya ni AGR ug sa iyang igsoong Mayor Rey Uy sa Tagum, ug anaa pa gihapon siya sa Lakas. Pasabot nga wa pa miabak ang gobernador ngadto kang Senador Manny Villar nga modagan pod pagka-Presidente- hangtud niadtong Byernes.
******
TINALIGSIK: Formidable ang tandem ni Dr. Miller Alaba, ang kanhi mayor, ug Atty. Mario Sapilan, No. 1 councilor, sa Maco, Comval. Gikataho ang Alaba-Sapilan tandem nga moparang batok ni Mayor Voltaire Rimando ug Bise Mayor Charles Suelto. Puros Top 1 councilor ning si Alaba ug Sapilan…. Kanhi Gov. Joecab Caballero “either for governor or for congressman pa rin”. Ayaw na na dugaya uy kay daghan na naghinam-himan sa Uy-Joecab or Amatong-Joecab fight. Kinsa kaha sa duruha ang makagasto sa 2010?….. Mideklarar na nga modagan pagkamayor sa Tagum ang retiradong police investigator Cesar Cuntapay. Matud niya sa “Histoganay sa Onse” nga TV program sa Skycable-Tagum modagan siya aron paubsan ang taas nga mehurasan sa syudad ug aron protektahan ang Tagum consumers…. “Di tinoud ang balita nga si Maragusan Mayor Cesar Colina sa Comval na-suspended ug gipolitika lang kani,” matud pa ni Atty. Daniel Campoamor, kinsa close friend sa mayor. Nabaniog man gud nga tungod kay daghang namatay sa bardown sa Pamintaran gold rush area ug wa kahimog aksyon ang mayor mao nga nasuspended. Di diay kani tinoud. (Alang sa inyong reksyon, e-mail: chamonforte@yahoo.com, text: 09392218348)
Filed under: Bise Mayor Charles Suelto, Boardmember Antonio Lagunzad, Compostela Valley Governor Arturo "Chiongkee" Uy, Mayor Voltaire Rimando, anthony rafael g. del rosario, atty. daniel campoamor, cesar cuntapay, maragusan mayor cesar colina , anthony rafael g. del rosario, atty. daniel campoamor, Bise Mayor Charles Suelto, Boardmember Antonio Lagunzad, cesar cuntapay, Compostela Valley Governor Arturo "Chiongkee" Uy, maragusan mayor cesar colina, Mayor Voltaire Rimando
Recent Comments