Ni Cha Monforte, Rural Urban News
MARCH 19
Gipamulong kagahapon sa usa ka taas opisyal sa militar sa Davao del Norte nga wala pa silay nahibal-an nga may kandidato nga mihatag ug kwarta para sa Permit to Campaign nga ginapangayo sa mga rebelde sa New People’s Army aron way babag nga makapangampanya ang mga politiko sa mga hilit nga dapit sa probinsya karong piniliay.
Matud pa ni Army Colonel Dominggo Tutaan, deputy commander sa 1003rd Brigade, sa kasamtangan bisag ang military aktibong nagabatok sa mga illegal nga mga aktibidades sa NPA lakip na ang “extortion pinaagi PTC” wa pa gihapoy nahibal-an ang militar nga may kandidato na sa Davao del Norte ang mibayad sa PTC ug gitawag nga Permit to Win (PTW) nga gina-issue sa NPA panahon sa piniliay.
Apan matud ni Col. Tutaan basi sa mga nangaging piniliay sa 2001, 2004 ug 2007 ang rebeldeng kalihukan nakaani ug $46 milyones o P2 bilyones gikan sa PTC ug PTW sa tibouk nasud.
“Nanginahanglan kita ug kumpleto nga ebedensya, mga documentary evidence kay makalapas kita sa katungod anang tawhana,” pamulong pa ni Col. Tutaan sa inenglish, kini human nga iyang kusganong mimakmak sa makadaghan ang pulang kalihukan diin iyang gibanhig apil niini ang mga legal organizations ug partylist organizations sama sa nakadaug na nga Bayan Muna, Gabriela, Kilusang Mayor Uno, Suara Party, League of Filipino Students, ug uban pa.
Wa hinoon namulong si Tutaan nga ang militar naga-espiya na karon sa mga kandidato sa piniliay.
Giingon sa militar nga ang kantidad sa bayad sa PTC ug PTW nagkalain-lain base sa posisyon nga gidaganan sa mga kandidato.
Mibutyag usab si Col. Tutaan nga ang Davao del Norte aduna lamay duha ka lungsod- ang Talaingod ug New Corella, diin may ang pipila ka parte niini anaa sa watchlist category 2 sa military tungod kay kini adunay presensya sa mga armadong rebeldeng NPA ug ila kining gibantayan nga dili maeksploytar sa mga rebelde ang proseso sa umaabot nga piniliay.
“May supisyente usab nga pwersa ang militar sa pagbantay sa 273 polling places sa tibouk probinsya aron maseguro nga magmalinawon ug hapsay ang umaabot nga piniliay,” dugang pa niya.
Si Col. Tatutaan usa sa mga bisita sa Kapihan sa Kapitolyo kagahapong adlawa didto sa Media Center sulod sa Kapitolyo sa Mankilam, Tagum City, atol sa paglusad sa Candidates Forum 2010 nga may temang “Alamin nang husto; Iboto ng husto” nga gipasiugdahan sa kagamhanang probinsyal, Philippine Information Agency ug Commission on Elections- Davao del Norte provincial office.
Mga bisita usab sa okasyon sila Governor Rodolfo del Rosario, Vice Governor Victorio “Baby” Suaybaguio Jr, ug Comelec provincial officer Atty. Marlon Casquejo.
Si Suaybaguio sa pagpangutana sa iya sa media kung nakaeksperensya na ba kini sa pagbayad sa PTC mibutyag nga wala gayod siya “nag-apil-apil ana” gikan pa siya nahimong mayor sa tulo ka termino sa syudad sa Tagum.
Matud niya sa pakighinabi siya gitagaan ug mandato sa katawhan makadaghan tungod sa kusog sa iyang liderato ug maayong rekord sa panerbisyo sa katawhan, ma taga syudad o ma taga hilit nga dapit man.
Sa iyang parte, si Gov. Del Rosario, kinsa way kontra pagka gobernador karong piniliay, nagpasalamat sa katawhan sa probinsya sa pagdawat sa iyang kandidatura, ug nanawagan sa katawhan nga tungod kay ang piniliay kaparte man sa demokratikanhong proseso sa nasud gikinahanglan gayod nga iseguro usab kini sa katawhan nga bantayan, ug tun-an usab ang bag-ong proseso sa automated election aron mamahimo kining malinawon ug may kredibilidad ang resulta niini. (Cha Monforte/Rural Urban News)
Filed under: Army Colonel Dominggo Tutaan, Army Colonel Dominggo Tutaan, rmy Colonel Dominggo Tutaan
Recent Comments