NEWS: Pulis mas alerto karon sa Tagum bisperas, pista- Gunabe

Seguridad pahugtan pa gyud

nov 22

Pahugtan pa gayud ug ensakto ang pagbantay sa kapulisan sa seguridad sa syudad karong adlawa nga bisperas na sa kapistahan ni Patron Kristong Hari sa syudad sa Tagum.

Magduha na ka semana sugod nga gipataas sa kapulisan ngadto sa heightened alert ang ilang 0agbantay sa kalinaw sa syudad.

Sa pagpahugot sa kapulisan sa ilang pag-gwardya aktibong ginamobilisar usab ang mga barangay tanod, matud pa ni Tagum City police chief Dario Gunabe sa pakighinabi kagahapon.

Subay niini, ang hepe sa kapulisan nanawagan usab sa suporta sa katawhan sa pagsalmot sa pagbantay sa kalinaw tungod kay matud niya gamay ra gayud ang mga elemento sa kapulisan ikumpara sa kadaghanon sa katawhan sa syudad.
Bisan niini kanunay pa gihapong alerto ug aktibo ang kapulisan sa pagpakgang sa mga krimen nga makadaut sa maayong estado sa kahusay ug kalinaw sa syudad, dugang pa ni PSupt. Gunabe.

Siya usab mipahibalo nga sa natalang estadistika sa kapulisan sa tibouk nasud nakit-an nga sa bulan sa Nobyembre ug Disyembre partikularmente sa panahon sa kapaskuhan taas gayud ang national rate sa crime against property.

Nagpasabot, matud niya, nga modaghan ang mga kaso sa kawat, pagpanglungkab ug uban pang krimen batok sa propriedad.

Ang unang makakontra niining klaseng krimen mao ang pagbantay mismo sa katawhan sa ilang pinuy-anan diin anaa ang ilang mga propriedad, matud pa sa hepe. (Cha Monforte/Rural Urban News) http://ruralurbanews.blogspot.com

Filed under: tagum city fiesta, Tagum police chief Dario Gunabe, tagum city fiesta, Tagum police chief Dario Gunabe